"THE-3-MONTH-RULE"

“Bash hindi mo ba alam yung three month rule. Lahat ng taong na inlove at naki pag break ay alam yun. Bash maghihintay ka muna, tatlong buwan. Di ba tatlong buwan bago ka makipag-boyfriend ulit. Hindi mo alam yun!… Bash may dalawang linggo pa ko. Dalawang linggo pa. 
Ba’t ba kating-kati kang palitan ako?!” -Popoy

Pahamak talaga tong "One More Chance", yung tipong kahit matagal na tong movie na to eh, usong uso pa din lalo na sa mga brokenhearted, hoping pa din at yung walang kamatayang "forever ikaw at ako din sa huli." Pamahak kasi pag pinanood mo to, kahit ayaw mong tamaan eh tatamaan ka pa din at tatagos sa puso yun bawat linya ni Popoy at Basha. May pinagdadaanan ka man o wala, hindi pwedeng hindi ka makaramdam ng kahit konting lungkot at may mangilid na luha sa iyong mga mata. Nakakainis diba? Yung tipong buo na yun loob mo para magmove on, tapos bigla na lang makakapanood ka ng mga pelikulang ganito o makakarinig ng mga love story tapos bigla ka na lang magbabalik-tanaw na parang pelikula ring nagpe-play sa isip mo yung mga memories niyo nung partner mo nuong time na masaya pa kayo at nagmamahalan na parang wala ng katapusan tapos yun ending eh magkakahiwalay din pala. Ansakit noh?

So dahil nga sa palabas na to, eto yung version ko sa 3-month-rule na sinasabi ni Popoy kay Basha.

Yung 3-month-rule na yan, ayon sa karamihan ay applicable lamang sa dalawang taong matagal ng magkarelasyon pero bandang huli sa hindi inaasahang pagkakataon at sa hindi malamang dahilan eh sa hiwalayan nauwi. Yung forever na naging "whatever" na lang at yung mga pangarap na parang yelong natunaw na lang. Wala daw itong scientific basis o reference. Sabi nga eh sa One More Chance lang daw to nauso dahil sa lahat naman ng nagkakahiwalay eh imposibleng walang kapalit agad o di kaya naman during the relationshit pa lang eh meron na palang iba at para to play it safe, makikipaghiwalay sa una para maging official sila nung pangalawa. So sa ganung mga senaryo eh hindi na nasusunod yung 3-month-rule na yan. Pero sabi nga, kung talagang minahal mo yung ex mo, rerespetuhin mo yung tagal ng pinagsamahan niyo. At eto nga yung purpose ng sinasabing 3-month-rule na yan.


Ano nga ba yun napapaloob sa "THE 3-MONTH-RULE"?
Uulitin ko, applicable lang to sa mga taong nagmahal talaga ng totoo pero kung fling lang or hindi mo namang talaga minahal yung tao eh hindi mo na kailangang gawin to.

• "Me-Time" meaning mag-isa hindi yung makikipagflirt ka na agad agad. Please lang pwede namang magpahinga ka muna at hayaang totally makamove-on. Free yourself from stress, pait at sakit na dulot ng recent relationshit mo.

• Dapat hanggang 3-months lang daw ang pinakasagad na palugit para iblock siya sa FB. After that, dapat kahit papaano nabawasan na yung bitterness mo. Pwede ding forever mo na siyang iblock kung ayaw mo na talaga siyang makausap o ni makita ever in your life. At kung ginawa mo yun dahil may tinatago ka then tama yan itago mo na lang. Dont be proud na iniwan mo siya dahil nakahanap ka ng mas better.

• Kung inunfriend ka niya o blocked sa FB, ipublic ang post na gusto mong mabasa niya. Malay mo nag-iistalk siya.

• Bawal magpost ng happy photos lalo na yung may kasama kang iba. Baka isipin pa niya eh nakaget over ka na agad agad. Okay lang yun selfie para makita niya kung gaano ka gumaganda/gumagwapo. Malay mo deep inside nagsisisi na yun na iniwan ka niya.

• Huwag mo ng isauli yung mga gamit at regalong ibinigay niya. Huwag mo ring itatapon o sunugin. Pwede mo pang pakinabangan yan, Sabi nga ni OLX.ph, "ibenta na yan!" Or kung loveletters at random paper thingys naman yan, ipakilo mo sa junkshop hehe malay mo tanggapin dun.

• Huwag idelete lahat ng pictures niyo together. Magtira ka nung pinakafavorite mong moments para kung sakali bigla mo siyang mamiss eh may titignan ka. Saka mo na idelete lahat pag yung tipong alam mong hindi mo na panghihinayangan after mo burahin. Minsan kasi sa sobrang bitter natin gusto natin takbuhan lahat thinking na yun yung tamang way para makamove on. 

         Second option, ilipat na lang sa private folder ng pc o di kaya isave sa isang usb/hard drive

         lahat ng happy pictures niyo tapos ibaon mo sa lupa. Hehe. Ang harsh!

• Huwag nang balikan ang mga favorite places niyo. Lalo ka lang malulungkot at malay mo makita mo pa siya dun na may kasama ng iba.

• Iwasang kumain ng mga favorite foods niyo, may tendency na mabilaukan ka at ikamatay mo pa ito. Sige ikaw rin, hehe.

• Huwag mong ibroadcast sa buong universe na may "someone new" ka na, ang sakit nun pwede namang magpanggap na "friends" lang muna kayo habang hindi pa tapos yung 3 months. Tutal sa "friends" naman talaga nagsisimula lahat ng love love na yan eh.

• Kung ikaw yung nang-iwan, bawal magselos o magduda kung makita mong parang may umaaligid sa ex mo. Iniwan mo tapos eemote emote ka jan, Gago lang? Wag ka mag-alala dahil lahat ng iniiwan hindi pa yan handang magmahal ulit dahil yun walang pakundangang nang-iwan pa din sa kanila yun laman ng puso nila.  

          Kung ikaw naman yun naiwan, okay lang yan, magselos ka pero in moderation lang ha.

          Dahil pinagmukha ka na nga niyang tanga, tapos papatunayan mo pa. Kaya hinay-hinay lang.

• Kung lalabas ka, siguraduhin mong mga kaibigan mo talaga ang kasama mo. Hindi yung ang kaibigan na kasama mo sa mga gimik eh yung kaibigan na may "pagtingin" ka at gusto mong maging GF/BF.

• Iwasang madevelop sa mga taong mahilig mag-advice sayo. Yun taong andyan para patawanin ka. Kadalasan sila yung mga bantay-salakay na sasamantalahin yun kahinaan mo. Wag maging marupok, bandang huli ikaw rin ang mapapahamak.

• Bawal makipagchat o makipagkilala sa kahit sino mapaFB, twitter, IG o anupamang social networking sites.Magpigil ka muna, 3 months lang naman.

• Huwag kang masyadong assuming. Alalahanin mo wala na kayo. Anuman ang gawin o sino man ang makasama ng ex mo, its none of your business. Still give a damn respect. Panghawakan mo na lang yung pagkakakilala mo sa ex mo. Kung siya yung tipo alam mong hindi papatol sa kung sino sino, swerte mo kasi matagal tagal bago ka mapalitan sa puso niya. Pero kung siya yung tipo na alam mong takot mapag-isa o sadyang hindi makuntento, asahan mo ng baka hindi pa natapos ang 3 months eh may kapalit ka na agad.

• Higit sa lahat, huwag masyadong umasa sa second chance. Bihira ng mangyari yun. Dahil sa panahon ngayon, kakaunti na lang yung mga taong alam ang salitang "makuntento" at "manindigan".  Tingin mo anong naiwan niya sayo para bumalik pa siya ulit? At bakit pa siya babalik kung kaya ka niya iniwan eh dahil hindi na siya kuntento at hindi ka na niya kayang panindigan..diba? Oh sabi ko nga case to case basis din yan.

Pero minsan talaga, hindi sapat ang 3 months para tuluyan mawala ang lahat ng sakit na nararamdaman mo sa breakup niyo. Minsan kasi dun pa lang magsisink in sayo na mag-isa ka na lang pala talaga. Ang totoo, wala yan sa araw, buwan at taon para makalimot sa isang taong minahal mo ng lubusan. Hindi hawak ng kalendaryo ang feelings mo kaya hindi mo rin malalaman kung kelan ka talaga makakalimot at makakamove on. Ika nga, nasa deep intense yan ng pinagsamahan niyo. Yung tipong sa utak mo alam mong once-in-a-lifetime moments yung mga pinagdaananan niyo, it would even take you years para totally makalaya sa sakit at panghihinayang sa anumang nawala. Pero kung hindi mo naman talaga minahal yun ex mo o during the relationshit pa lang eh nafall out of love ka na sa kanya, baka 1 week lang eh paniguradong single and ready to mingle ka na agad.

Pero sana mawala man yung pagmamahal mo sa isang tao dapat andun pa rin yung respeto kahit hindi na kayo. Dapat rin hintayan mo munang fully recovered at nakamove on ka na bago ka pumasok ulit sa panibagong relationshit para hindi naman maging unfair sa bago mo. Baka isipin pa niya eh ginagamit mo pa siya para lang makatakas sa lungkot. Mahirap maging single pero mas mahirap kung paulit ulit ka na lang masasaktan.

Anong mapapala mo sa "THE 3-MONTH-RULE"?

• Malalaman mo kung ano talaga yung naging ugat ng breakup niyo.
• Maiisip mo yung mga mali at naging kakulangan ng bawat isa.
• Marerealize mo yung mga bagay sa sarili mo na dapat mong i-improve o baguhin.
• Magkakaroon ka ng sapat na panahon para mapag-isipan kung may pag-asa pa bang maaayos yung relasyon niyo o wala na talaga.
• Matututo ka sa mga pagkakamali mo at mas magiging maingat sa susunod.
• Maari ka pa ding masaktan sa parehas na dahilan pero mas maiintindihan mo na kung mangyari man ulit yun.

______________________________________________________________

Mahirap ba?

3 months na pahinga.

3 months na pagmomove on

3 months na bakante.

3 months para buuin ulit ang sarili.

3 months para matutunan mo ulit maging masaya nang wala na siya.

"Tandaan mo, ang 3 month rule ay hindi isang sakripisyo kundi ito ay 

isang respeto na binibigay sa taong minahal mo ng totoo."


Minsan din, hindi mo kailangan ng 3-month-rule na yan. 
Dahil pag mahal mo talaga yung taong nawala sayo, hindi mo gugustuhing makamove on. Magpapatuloy ka pa rin sa pagmamahal sa kanya kahit na hiwalay na kayo at kahit pa imposible ng maging kayo ulit.


till next emote :)

*may mga dinagdag at inedit as of kani-kanina lang.